Iako stručnjaci stalno upozoravaju da se svaka beba razvija svojim tempom, sve je više mladih roditelja koji osjećaju neku vrstu anksioznosti jer smatraju da se njihovo dijete ne razvija onako kako to piše u tablicama razvojnih prekretnica.
U moru informacija o tome što njihova beba u određenom periodu odrastanja mora, može i treba, mnogi roditelji strahuju da se dijete ne razvija pravilno.
Mame na društvenim mrežama čitaju o tome što sve mogu druge bebe, na internetu nalaze tekstove o tome što bi bebe trebalo da rade u kojem periodu razvoja, a kao posljedicu samo osjećaju stres i frustraciju.
„Zbog tjeskobe koju osjećaju roditelji, milenijalci, vezano uz razvoj svojih beba, brojnim mamama treba podsjetnik da je sa njihovom bebom sve u redu“, izjavila je pedijatrica Mona Amin za portal babygaga.com.
Kada se razvoj njihove bebe ne poklopi sa datumima u razvojnoj mapi, mame i tate počinju sebi da prebacuju da su zakazali kao roditelji. Kada dijete, na primjer, ne može da uhvati bradavicu, mame počinju da se pitaju: „Što radim pogrešno? Zašto ne mogu da dojim?“
Ili, kada dijete napuni 12 mjeseci i još nije počelo da hoda, prevagne osjećaj krivice, pa mama kaže: „Dijete mog prijatelja već hoda, a ima samo 10 mjeseci!“
Ako ste se prepoznali u ovim navodima, stručnjaci savjetuju da uvijek kad vas obuzmu strahovi, imate na umu sljedeće:
1. Da vaše dijete ima svoj vremenski proces i liniju razvoja.
2. Da se početak hodanja, govora i odlazak na nošu odvijaju onim tempom koji je najprimjereniji za vaše dijete.
Ako ste zabrinuti i mislite da je vaše dijete frustrirano jer ne može da hoda ili govori, obratite se pedijatru.
„Danas na društvenim mrežama postoji puno grupa za mame u kojima one upoređuju djecu. Mnoge od njih iznose svoja iskustva o tome u kojem je periodu njihovo dijete usavršilo neku vještinu, što je za mnoge mame izvor brige i straha da sa njihovom bebom nešto nije u redu. Zbog stresa koji tada osjećaju, mame gube iz vida da njihova beba zapravo napreduje“, upozorila je Amin.
Zabrinutim roditeljima savjetovala je da hitno promijene pogled na ulogu koju imaju prekretnice.
„Kada razmišljate o prekretnicama, razmišljajte o tome da su one samo vremenski okviri u kojima bi bebe trebalo da savladaju neku vještinu“, rekla je ona.
Kao primjer je navela početak hodanja. „Normalni“ period u kojem bi dijete trebalo da prohoda je do 18 mjeseci. Riječ je o, rekla je, prilično dugačkom periodu i bez obzira na to je li vaše dijete prohodalo sa 10, 12 ili 18 mjeseci, budite mirni jer se ono razvija potpuno normalno.
„Kada se mama utrkuje sa drugim mamama kako bi njena beba što prije stigla do prekretnice, propušta važne trenutke sa svojim djetetom“, upozorila je Amin i istakla da to može imati loš uticaj i na odnos mame i bebe, a može se negativno odraziti i na razvoj.
„Kada mama želi na silu da natjera svoju bebu da progovori, jer smatra da bi ona već trebalo da zna određeni broj riječi, djetetu to samo može biti stresno“, rekla je Mona Amin koja poručuje roditeljima da prestanu da upoređuju svoje bebe sa drugima.
Prema tablici koju je razvio američki Centar za prevenciju i kontrolu bolesti, važno je pripaziti na to kako se vaše dijete igra, uči, govori i ponaša.
Prekretnice pokazuju što je tipično za određeni uzrast, ali prilagođavanje djetetovim potrebama i željama najbolji je način da mu pomognete da napreduje.
U nastavku pročitajte još nekoliko savjeta:
-Pronađite način kako da pružite potrebnu podršku, a da ne požurujete proces učenja.
-Nemojte kriviti sebe i pokušajte da ne stvarate veliki pritisak na dijete u želji da ubrzate njegov razvojni proces.
-Očekivanja koja ste postavili sebi ne samo da predstavljaju stres za vas, nego i za dijete.
-Razgovor sa ljekarom može vam pomoći da stavite vaša očekivanja u realnu perspektivu.
-Ne zaboravite da je vaše dijete jedinstvena osoba.
-Ponašanje i iskustva vašeg djeteta nijesu uvijek pod vašom kontrolom.
– Kada naučite da prihvatite svoje dijete baš onakvo kakvo ono jeste, ono će se i samo osjećati prihvaćenije, a vi ćete se opustiti i uživati u roditeljskoj ulozi.
Izvor: roditelji.hr
