PIŠE: Žarko Vučinić, kuvar i nutricionista

Potrebne namirnice za 4 osobe:

–          800 gr fileta ribe list ili četri komada;
–          200 gr putera;
–          100 gr brašna;
–          120 gr kapara;
–          200 ml neutralne pavlake;
–          40 gr kavijara;
–          1 limun;
–          Maslinovo ulje;
–          So,biber;
–          Peršun.

Način pripreme:

Filete ribe treba dobro osušiti ubrusom, potom ih nožem oblikovati. Krajeve možete ostaviti za čorbu na primjer, ili recimo rižoto. Kada smo ribu oblikovali i posušili, malo je posoliti, ne previše, malo pobiberiti i poprskati maslinovim uljem.Ribu ostaviti u frižideru da se marinira oko jedan sat. Nakon toga, u odgovarajući tiganj, rastopiti polovinu putera i malo dodati maslinovog ulja.

Ribu uvaljati u brašno sa obje strane i staviti na ugrijani tiganj da se prži. Čim bude gotova sa jedne strane, pažljivo je treba okrenuti na drugu, najbolje je to uraditi spatlom i hvataljkama, vodeći računa da se riba ne prelomi. Kada je gotova, stavimo je na već na pripremjeni tanjir koji smo prekrili ubrusom da popije višak masnoće. Dobro je i prekriti je ubrusom jer ćemo tako otkloniti sav višak ulja.

Na tiganju gdje smo spremali ribu, odlijemo ulje i sipamo kapare u cijelo, ne sjecekajući ih, a onda  dodamo neutralnu pavlaku. Ovo treba kuvati veoma kratko, na tihoj vatri. Potom dodati sitno sjeckani peršun, kavijar i na kraju vratimo ribu. Pošto smo filete ribe stavili u tiganj, pustimo da se lagano kračkaju par minuta na veoma tihoj vatri. Dodamo ostatak putera izrezan na listice i sok od jednog limuna.

Kao prilog možete poslužiti kuvani krompir sitno sjeckan na kockice, pomijesan sa blitvom ili spanacem, koje ćete začiniti maslinovim uljem, limunovim sokom, sjeckanim bijelim lukom,  sa malo soli i bibera.