PITANJE od Biljane:

Htjela sam Vas pitati za jedan savjet. Moje dijete ima 15 mjeseci, Prije nekih mjesec i po dana je krenula u vrtić. U početku smo imali jako velikih muka, te plakanje, vrištanje i slično. Kući kad dođe nije htjela iz maminih ruku da se spušta. Sad se to malo smirilo, ali i dalje toga ima, samo ne u tolikoj količini.

Preko noći zna de se budi i plače, bas jako, i ako je mama ne uzme počinje sve jače i jače.. Ne govori ništa, ali sve razumije što joj se kaže. Zna reći mama, tata, ćak ne zna ni baba, deda, što većina njih zna do tog doba. Da li bih se trebala zabrinuti?

Molila bih Vas za savjet isto sta da radimo sa njenom nervozom, jer od momenta kad je uzmem iz vrtića, ona počinje neku nervozu i plakanje, a ako nešto nije po njenom, to je tek katastrofa. Ne znam šta više da radim. Ima dana kada se i ja iznerviram, ne znajući šta da joj uradim, pa počnem vikati, pa ona još više počne plakati. Moja greška, znam…ali šta ću.Šta da radim? Onda se isto slabo igra u vrtiću sa djecom. Molim Vas za savjet za sve što sam Vam rekla.

ODGOVOR OD dr Nine Mandić, PZU Doktorica Mica: Vaše dijete je očito vrlo osjetljivo i emotivno.Sada je i u takozvanoj fazi “prve separacije”, kada postaje svjesno da ono i roditelji nijesu jedna osoba pa je zbog toga i inače ovaj uzrast vulnerabilan.

Dječji psiholozi smatraju da je dijete spremno za odlazak u vrtić tek s navršene tri godine, pa ako imate načina da vrtić odgodite to bi za dijete bilo poželjno.

Ako ne, trudite se da budete beskrajno strpljivi i s njom provodite što više vremena kad ste zajedno kod kuće.